काठमाडौं – नायिका उपसना सिंह ठकुरीको व्यस्तता बढ्दो छ । गत वर्ष उनको फिल्म ‘खुस्मा’ हिट बन्यो । वर्षको अन्तिममा फिल्म ‘कर्मा’ प्रदर्शनमा आयो । ‘खुस्मा’ हिट हुँदा ‘कर्मा’ भने फ्लप भयो । तर, उपासनाको हातमा फिल्मको कमी छैन ।

‘खुस्मा’ का निर्देशक अशोककुमार थापाको अर्को फिल्म ‘जलाकी’ मा उपासना अनुबन्ध भएकी छन् । फिल्मकाे पहिलो चरणको छायाङ्कन पूरा भएको छ । ‘खुस्मा’ मा रुचाइएको उपासना र धिरजको जोडी दर्शकले ‘जलाकी’ मा पनि देख्न पाउने छन् ।

‘जलाकी’ को छायाङ्कन पूरा नहुँदै उपासनाको हातमा अर्को फिल्म आइपुगेको छ । निर्देशक मिलन चाम्सको नयाँ फिल्म ‘सुम्निमा’ मा उनी अनुबन्ध भएकी हुन् । निर्देशक चाम्सले बुधबार सामाजिक सञ्जालमार्फत् उपासना फिल्ममा आबद्ध भएको जानकारी दिएका हुन् ।

गत फागुनमा प्रदर्शनमा आएको फिल्म ‘अञ्जिला’ हिट भएपछि निर्देशक चाम्सले नयाँ फिल्म बनाउने तयारी थालेका हुन् । यस फिल्ममा शीर्ष कलाकारमा उपासना मात्रै अनुबन्ध भएकी छन् ।

बेलायतमै बस्ने २० देखि २६ वर्ष उमेर समूहको नायकको खोजीमा चाम्स छन् । अडिसनमार्फत् नायक खोज्ने तयारीमा छन् ।

आगामी जुलाईबाट प्रेम कथामा आधारित यस फिल्मको छायाङ्कन सुरु हुने निर्माण पक्षले बताएको छ । यसको छायाङ्कन बेलायतमा हुने बताइएको छ । चाम्स इन्टरटेनमेन्ट र गोर्खा फिल्म्सको संयुक्त ब्यानरमा निर्माण हुने फिल्मका लेखक राजीव थापा हुन् ।