काठमाडौं – कमल थापा नेतृत्वको राप्रपा नेपालले तीनकुने घटना सरकारको नियोजित षडयन्त्र भएको निष्कर्ष निकालेको छ ।

सोमबार बसेको केन्द्रीय कार्य सम्पादन समिति बैठकले चैत १५ गतेको तीनकुने घटनालाई अराजक र हिंसात्मक बनाउन सरकार स्वयम् लागेको निष्कर्ष निकालेको हो ।

उक्त घटनालाई प्रशासनिक दमनको संज्ञा दिँदै राप्रपा नेपालले उच्चस्तरिय न्यायिक आयोग गठन गरी निष्पक्ष छानविन गर्न माग गरेको छ ।

राप्रपा नेपालले कुनै अराजक गतिविधिमा संलग्न नरहेकाहरूलाई झुठा मुद्दा लगाई थुनामा राखिएको निष्कर्ष निकालेको छ । सबैलाई तत्काल रिहा गर्न समेत राप्रपा नेपाल सरकारसँग माग गरेको छ ।

राप्रपा बैठकले हिन्दुराष्ट्र र राजसंस्था सहितको प्रजातन्त्र पुनःस्थापना गर्न डा.जगमान गुरुङको संयोजकत्वमा गठित संयुक्त जनआन्दोलन समितिलाई पूर्ण रूपले सहयोग र समर्थन गर्ने निर्णय पनि गरेको छ ।