काठमाडौं– नेपालको बैंकिङ क्षेत्र असुरक्षित छ भन्दै भ्रम फैलाउनेलाई कारबाही गर्न बैंकर्सहरूले माग गरेका छन् । 

नेपालको बैंकिङ क्षेत्र सुरक्षित रहेको भन्दै आज नेपाल बैंकर्स संघ, डेभलपमेन्ट बैंकर्स एशोसिएसन नेपाल, नेपाल वित्तीय संस्था संघ र नेपाल लघुवित्त बैंकर्स संघले संयुक्त विज्ञप्ति जारी गर्दै यो विषयमा भ्रम छर्नेलाई कारबाही गर्न माग गरेका हुन् ।

‘अन्तर्राष्ट्रिय बैंकिङ सिद्धान्तको व्यवस्थाहरू तथा नेपाल राष्ट्र बैंकले तोकेको नीतिगत व्यवस्थाहरूको पालना गर्दै बैंकिङ क्षेत्र उदाहरणको रूपमा स्थापित भएको छ । नेपालका बैंक, वित्तीय तथा लघुवित्त संस्थाहरूमा जोखिम बहन गर्ने क्षमता भएको र आजको दिनमा यी संस्थाहरू सुरक्षित रहेको ब्यहोरा स्पष्ट पार्दछौँ’, संस्थाहरूले संयुक्त रूपमा जारी गरेको विज्ञप्तिमा भनिएको छ ।

नेपालको बैंकिङ क्षेत्रलाई खलबलाउन अराजक गतिविधि भइरहेको भन्दै भ्रामक र गलत अभिव्यक्तिहरूप्रति ध्यानाकर्षण भएको संघले जनाएका छन् । साथै, बैंकमा निक्षेपकर्ताहरूको निक्षेप पूर्णरूपमा सुरक्षित भएको भन्दै नेपाल सरकारद्वारा स्थापना गरिएको निक्षेप तथा कर्जा सुरक्षण कोषमार्फत ५ लाख सम्मको बचत सुरक्षण गरिएको विज्ञप्तिमा उल्लेख छ ।

‘साथै, आम–सर्वसाधारणहरूलाइई त्रसित पार्ने, समाज खलबलाउने, गलत र आपत्तिजनक अभिव्यक्तिm दिने र ग्राहकलाई बैंकिङ सेवा प्रयोग गर्ने अधिकारबाट वञ्चित गराउनेहरूलाई कानूनको दायरामा ल्याई आवश्यक कारबाही गर्न समेत सरकारी निकायहरूलाई आग्रह गर्दछौँ’, बैंकर्सहरूको विज्ञप्तिमा भनिएको छ ।