काठमाडौं– रूसले युक्रेनको पूर्वी भूभागमा रहेको दोनेत्स्क क्षेत्रको कुराखोवे सहर फेरि कब्जा गरिएको दाबी गरेको छ । 

रूसले आफ्ना सैनिकहरूले कुराखोवे सहर फेरि कब्जा गरिएको दाबी गरे पनि युक्रेनले दाबीलाई अस्वीकार गरेको छ । 

कुराखोवे सामरिक दृष्टिकोणले रूस–यूक्रेन सीमामा अहम् स्थान मानिन्छ । आइतबार  युक्रेलेन उक्त क्षेत्रमा जवाफी आक्रमण सुरु गरेको थियो । तत्पश्चात नै रूस र युक्रेनका सेनाबीच भीषण युद्ध जारी रहेको बीबीसीले जनाएको छ ।

बीबीसीमा प्रकाशित समाचार अनुसार सामाजिक सञ्जालमा एउटा तस्बिर यतिबेला चर्चामा छ । समाचार एजेन्सी रोयटर्सले उपलब्ध गराएको तस्बिरमा कुराखोवेमा एक सैनिकले रूसको झण्डा उठाएको देखिन्छ ।  

तर, बीबीसीले उक्त तस्बिरको पुष्टि हुन नसकेको उल्लेख गरेको छ । युक्रेनको संगठित सेनाका प्रवक्ता भिक्टर त्रिहुबोभले सोमवार बिहानसम्म युक्रेनी सेना कुराखोवेभित्र रूसी सेनासँग युद्ध गरिरहेको बताएका छन् ।