वासिङ्टन – २०२६ को फिफा विश्वकपको समूह चरणको ड्र सार्वजनिक भएको छ। गएराति विश्वकपको ड्र अमेरिकाको वासिङ्टन डीसीमा सार्वजनिक भएको हो।

विश्वकप यसपटक ४८ टोली सहभागी हुँदैछन्। जसलाई १२ समूहमा विभाजन गरिएको छ। अमेरिकी राष्ट्रपति डोनाल्ड ट्रम्पको उपस्थितिमा भएको यो ड्रले प्रतियोगिताको प्रारम्भिक स्वरूप स्पष्ट बनाएको छ।

संयुक्त राज्य अमेरिका, क्यानडा र मेक्सिको सह-आयोजक भएकाले तिनै देशलाई समूह निर्धारणअघि नै स्वतः शीर्ष पोटमा राखिएको थियो।

ड्रअनुसार मेक्सिको समूह ‘ए’ मा परेको छ। दक्षिण कोरिया, दक्षिण अफ्रिका र युरोपेली प्लेअफ ‘डी’ बाट आउने टोली यो समूहमा रहनेछन्।

क्यानडालाई समूह ‘बी’ मा राखिएको छ जहाँ उसको सामना स्विट्जरल्याण्ड, कतार र युरोपेली प्लेअफ ‘ए’ विजेतासँग हुनेछ। संयुक्त राज्य अमेरिका समूह ‘डी’मा छ। उसँग अष्ट्रेलिया, पराग्वे र युरोपेली प्लेअफ ‘सी’ विजेता जोडिएका छन्।

ब्राजिल समूह ‘सी’ मा मोरक्को, स्कटल्याण्ड र हाइटीसँग भिड्नेछ। जर्मनी समूह ‘ई’ मा इक्वेडोर, आइभोरी कोस्ट र कुराकाओसँग प्रतिस्पर्धा गर्नेछ।

नेदरल्याण्ड्स समूह ‘एफ’ मा जापान, ट्युनिसिया र युरोपेली प्लेअफ ‘बी’ विजेतासँग रहेको छ। बेल्जियम, इरान, इजिप्ट र न्युजिल्यान्ड समूह ‘जी’ मा परेका छन्।

स्पेन समूह ‘एच’ मा उरुग्वे, साउदी अरब र केप भर्डेसँग खेल्नेछ। फ्रान्स समूह ‘आई’ मा सेनेगल, नर्वे र इन्टरकन्टिनेन्टल प्लेअफ विजेतासँग भिड्नेछ।

अर्जेन्टिना समूह ‘जे’ मा रहेर अष्ट्रिया, अल्जेरिया र जोर्डनसँग छ। उता पोर्चुगल समूह के मा कोलम्बिया, उज्बेकिस्तान र इन्टरकन्टिनेन्टल प्लेअफ विजेतासँग रहनेछ। इंग्ल्यान्ड समूह ‘एल’मा क्रोएशिया, पनामा र घानासँग प्रतिस्पर्धा गर्नेछ।

४८ टोलीको प्रारूप तयार भएपछि विश्वकपको पहिलो चरणमै विभिन्न महादेशका बलिया टोलीबीच चर्को प्रतिस्पर्धा देखिने निश्चित छ।

केही समूहमा प्लेअफबाट आउने टोली अझै निर्धारण भइसकेका छैनन्। तर मुख्य संरचना तयार भएकाले फिफाले समूह चरणका खेल तालिका र प्रयासरत तयारी प्रक्रियालाई अन्तिम रूप दिने चरणमा प्रवेश गरेको छ।