काठमाडौं- इस्लामिक समूहले दबाब दिएपछि बंगलादेश सरकारले प्राथमिक विद्यालयमा सङ्गीत शिक्षक राख्ने योजना रद्द गरेको छ । मुसलमान बहुसङ्ख्या रहेको बंगलादेशमा इस्लामिक समूहले सरकारलाई सङ्गीत शिक्षक नराख्न दबाब दिएको समाचार संस्था एएफपीले जनाएको छ ।

गत अगस्ट महिनामा प्राथमिक शिक्षासँग सम्बन्धित मन्त्रालयले सङ्गीत शिक्षक नियुक्त गर्न सर्कुलर जारी गरेको थियो । यद्यपि इस्लामिक समूहको दबाबपछि यस निर्णय रद्द गरिएको छ ।

मन्त्रालयका एक जना वरिष्ठ अधिकारीले एएफपीलाई जानकारी दिए अनुसार सङ्गीतसँगै शारीरिक शिक्षकको पद पनि खारेज गरिएको छ । यसबारे बंगलादेशको अन्तरिम सरकारले सार्वजनिक टिप्पणी गरिसकेको छैन ।

सरकारले सङ्गीत शिक्षक नियुक्त गर्ने तयारी गरेपछि त्यहाँको प्रभावशाली इस्लामिक समूह जमात ए इस्लामीले चर्को विरोध गरेको थियो । जमातका नेता मिया गोलाम परवारले विद्यालयमा धार्मिक प्रशिक्षार्थीबिना सङ्गीत र नृत्य शिक्षक राख्ने सरकारको निर्णय अस्वीकार्य रहेको बताए ।

सङ्गीत र नृत्य इस्लाम धर्मको विरुद्धमा रहेको भन्दै उक्त संगठनले विरोध जनाएको एएफपीले उल्लेख गरेको छ ।