काठमाडौं- नेपाली कांग्रेस कोसी प्रदेशका सभापति उद्धव थापाले पार्टीभित्रैका मान्छेले गलत भाष्य बनाउँदा जनता र कार्यकर्ता अन्योलमा परेको बताएका छन् ।

काठमाडौंको बत्तीसपुतलीमा जारी संस्थापन पक्षको नियमित महाधिवेशन दबाब भेलामा सञ्चारकर्मीसँग कुरा गर्दै सभापति थापाले यस्तो बताएका हुन् ।

उनले केन्द्रीय महामन्त्रीहरूबाटै जनतामा पार्टीको छवि बिगार्ने गरि गलत भाष्य निर्माण गरिएको बताए। उनले कांग्रेसलाई जनताले भोट हाल्दैनन्, जनतामा जान सकिँदैन भन्ने भाष्यले पार्टीलाई क्षति गरिरहेको तर्क गरे ।

‘कसैले प्रमाणित गर्दिनुस्, ग्यारेन्टी दिनुहोस् हाम्रो नेतृत्वमा भोट आउँदैन भनेर। हामी राजीनामा दिन तयार छौँ,’ थापाले भने, ‘भोट कस हाल्छन्, कसले हाल्दैनन् भनेर ठेक्का लिइदिने को को छन् ?’

नेता थापाले नेतृत्व परिवर्तन गर्नुपर्ने यो स्वभाविक समय भएकाले कार्यकर्तामा देखिएको आकाक्षांलाई सम्मान गर्नुपर्ने बताए ।

‘मुलुक खरानीमाथि छ । पहिले मुलुकलाई यसबाट मुक्त गरौँ,’ उनले भने, ‘चुनावबाट प्रतिनिधिसभा आएपछि संवसधानमा टेकेर देश सही दिशामा हिँड्छ।’

अहिलेका लागि राष्ट्रको हित प्राथामिक भएको भन्दै थापाले पार्टी जीवनको सुधार त्यसपश्चात गर्न सकिने तर्क गरेका छन् ।