काठमाडौं – फिल्म ‘अभिमन्यु : च्याप्पटर १’को प्रदर्शन मिति तेस्रो पटक सरेको छ । अहिलेसम्म यस फिल्मको चार फरक फरक प्रदर्शन मिति तोकिएको छ ।

फिल्म निर्माता कम्पनी सेनसिज सिनेमाले आइतबार यस फिल्मको नयाँ प्रदर्शन मिति कात्तिक २१ लाई तोकेको हो ।

वर्षाका कारण मुलुकको अवस्था सामान्य नरहेका कारण प्रदर्शन मिति हेरफेर गर्नुपरेको कम्पनीले जारी गरेको विज्ञप्तिमा उल्लेख गरिएको छ ।

यसअघि ‘अभिमन्यु’ प्रदर्शन मिति भदौ २६, असोज १३ र असाेज २४ लाई तोकिएको थियो ।

भदौ २३ र २४ मा भएको जेन-जी आन्दोलनले भदौ २६ को प्रदर्शन मिति प्रभावित भएको थियो ।

त्यसपछि यो फिल्मको प्रदर्शन मिति असोज १३ अर्थात् फूलपातीलाई तोकिएको थियो । फूलपातीमा ‘बलिदान’, ‘माइतीघर’ र ‘हरिबहादुरको जुत्ता’ले पहिला नै प्रदर्शन मिति तोकेका थिए ।

उक्त मितिमा ‘अभिमन्यु’ पनि आउँदा हलहरुलाई शो बाँडफाँटमा समस्या हुने भन्दै असोज २४ लाई नयाँ प्रदर्शन मिति तोकेको कम्पनीले विज्ञप्तिमार्फत् जानकारी दिएको थियो ।

असोज २४ आउन पाँच दिन बाँकी हुँदा फेरि यसको प्रदर्शन मिति हेरफेर गरिएको हो ।

कात्तिक २४ लाई प्रदर्शन मिति तोक्ने ‘अभिमन्यु’ पहिलो र एक्लो फिल्म हो । तर, यसको तीन दिन अघि अर्थात् कात्तिक २१ गतेलाई दुई फिल्म ‘जारी २’ र ‘मन बिनाको धन’ ले प्रदर्शन मिति तोकेका छन् ।

‘अभिमन्यु’का‍‍‍ नायक कामेश्वर चौरासिया, नायिकाहरु लक्ष्मी बर्देवा, सरिता गिरी र गौमाया गुरुङ हुन् ।

‘जारी २’मा नायक दयाहाङ राई र नायिका मिरुना मगर शीर्ष भूमिकामा छन् । यसको लेखक तथा निर्देशक उपेन्द्र सुब्बा हुन् ।

‘मन बिनको धन’मा बाल गायक अशोक दर्जी र गायक तथा संगीतकार टंक बुढाथोकी शीर्ष भूमिकामा रहेने बताइएको छ । यही फिल्मबाट टंकले निर्देशनमा डेब्यू गर्दैछन् ।