काठमाडौं – इन्द्रजात्रामा महाकाली नाचको प्रस्तुतिमा सहभागी कलाकारहरूले इन्द्रजात्राको क्रममा काठमाडौं दरबार स्क्वायर, हनुमान ढोकामा पवित्र नृत्य प्रदर्शन गरेका छन्।

नेवार परम्परामा देवीपूजा र राक्षसवधको प्रतीक मानिने महाकाली नाचलाई भाद्र महिनामा विशेष गरी इन्द्रजात्रा र गाईजात्रासँग जोडेर देखाइन्छ। यस नाचमा कलाकारहरूले देवी महाकालीसहित महालक्ष्मी, कुमारी, मुस्क्याखो, दैबग्य, खर्बुजा, मखा फ्यान, फाइजु, ब्याञ्जु, र गलेशी पुंखा देवीजस्ता पात्रहरूको भूमिका निर्वाह गर्छन्।

सातवटा नाच समुहहरू—खर्बुजा, दैबग्य, मुस्क्याखो, गलेशी पुंखा देवी, मखा फ्यान, फाइजु र ब्याञ्जुले प्रदर्शन गर्ने यो नाचलाई भक्तपुरमा दि प्याखं (देवी नाच) भनेर पनि चिनिन्छ। भक्तपुरको प्राचीन पहिचान बोकेको यस नाचलाई पुरातत्व विभागले अमूर्त सम्पदाको रूपमा दर्ता गरेको छ। महाकाली नाच वर्षमा दुई पटक—काठमाडौँमा इन्द्रजात्रा र भक्तपुरमा गाईजात्राका अवसरमा- मात्र प्रदर्शन गरिन्छ।

तस्बिरहरूः सफल प्रकाश श्रेष्ठ /नेपाल फोटो लाइब्रेरी