काठमाडौं- नेपाल अटोमोबाइल इम्पोर्टर्स एन्ड म्यानुफ्याक्चर्स एशोसिएसन (नाइमा)ले बुधबारदेखि भृकुटीमण्डमा ‘नाइमा नेपाल मोबिलिटी एक्स्पो २०२५’ आयोजना गरेको छ ।

बुधबारदेखि साउन २५ गतेसम्म चल्ने यो एक्स्पोमा कयौँ आकर्षक कार राखिएका छन् । यो एक्स्पोमा सिटी कारको बाक्लो उपस्थिति देखिएको छ।

मूल्य र सहजताका हिसाबले यस्ता कारतर्फ ग्राहकको आकर्षण बढ्दै गएकाले एक्स्पोमा आकर्षणको केन्द्र बनेका छन् ।

नाइमा अटो शोमा बीवाईडीको सिगल, एसक्युब इन्टरप्राइजेजले भित्र्याएको हेनरी भोल्ट्स, जिङपेङको लिङबक्स, रेनोको रेनो क्वीड ईभी, कियाको साइरोक्स, डिपलको लुमिन लगायत ह्याचब्याक र सिटी कार लन्च हुने तयारीमा छन् । अहिले, केई, बिएडब्लु, सेरेस, रेनल्ट, जिङपेङ, हेनरी लगायतले सिटी कार बिक्रीलाई प्राथमिकता दिइरहेका छन् ।

५० भन्दा बढी अटोमोबाइल ब्रान्डहरूको सहभागिता रहेको यस एक्स्पोमा ३५ नयाँ मोडल (१५ दुई पांग्रे, १५ चार पाङ्ग्रे, ५ कमर्सियल) सार्वजनिक हुन लागेको नाइमाले जनाएको छ । यसबाहेक संस्थाले प्रदर्शनीलाई लक्षित गरेर विशेष अनलाइन प्रतियोगिता पनि आयोजना गरेको छ ।

प्रतियोगितामा आज सम्ममा नाइमा अटो एक्स्पो सम्बन्धित भिडियो बनाएर सामाजिक सञ्जालमा अपलोड गर्ने एक उत्कृष्ट प्रतिस्पर्धीलाई एक लाख र श्रावण २१ देखि २५ सम्म अपलोड भएका १० उत्कृष्ट भिडियोहरू प्रत्येकलाई दश हजार नगद पुरस्कार प्रदान गरिने छ ।

यो एक्स्पोमा विद्युतीय, इन्धनचालित र हाइब्रिड सवारीसाधनको प्रदर्शनी हुनेछ तर पार्टपुर्जा भने राखिने छैन । ७० देखि ८० हजार मान्छेले एक्स्पोको भ्रमण गर्ने अनुमान गरिएको छ ।