काठमाडौं- नेपाली कांग्रेसका उपसभापति धनराज गुरुङले शाहवंशीय राजसंस्थालाई ‘मरिसकेको बाघको सिनो’ को संज्ञा दिएका छन् ।

मंगलबार प्रतिनिधि सभाको बैठकमा बोल्ने क्रममा उनले अहिले केही मानिसहरूले त्यही सिनो बोकेर हिँडिरहेको उल्लेख गरे ।

राष्ट्रिय प्रजातन्त्र पार्टीसहितका राजावादीले सिनो बोकेर हिँड्दै गर्दा गणतन्त्र पक्षधरहरूले पनि जिउँदै पो छ कि भनेर त्यसलाई लात्तीले हान्न नहुने नेता गुरुङले बताए ।

उनले राजसंस्थालाई २०६२/०६३ सालको दोस्रो जनआन्दोलनका क्रममा नेपाली जनताले लखेट्दै–लखेट्दै लगेर ठूलो भीरबाट खसालिसकेको बताए । राप्रपातिर तर्फलक्षित गर्दै उनले सिनो बोकेर हिँड्नेको काँध पनि गन्हाउने बताए ।

‘मरेको बाघलाई दुईचार जनाले फेरि काँधमा बोकेर यो त जिउँदै छ भनेर आउँदैमा लहलहैमा लागेर यो त साँच्चिकै जिउँदै छ कि भनेर मरिसकेको बाघलाई लात्ताले हान्ने हामी पनि उस्तै हो कि जस्तो मलाई लागेको छ’, उनले भने, ‘मरिसकेको बाघको सिनो बोकेर आउनेको काँघ त गन्हाउँछ नै । तर, हामीले सिनोलाई लात्तले हान्दा हाम्रो खुट्टा पनि त गन्हाउँछ होला नि ।’

उनले यसतर्फ ध्यान दिएर आफ्नै खुट्टालाई दुर्गन्धित बनाउनतिर गणतन्त्रवादी लाग्न नहुने बताए । ‘कर्म, व्यहार, दृष्टिकोण र उद्देश्य र गन्तव्यले यो व्यवस्थालाई सुदृढ गर्दै लाने हो,’ गुरुङले भने ।