काठमाडौं- राजसंस्था पुनर्स्थापनाका लागि संयुक्त जनआन्दोलन समितिले राष्ट्रिय प्रजातन्त्र पार्टी (राप्रपा) को आयोजनामा मंगलबार हुने प्रदर्शन तथा बृहत्त् आमसभालाई समर्थन जनाएको छ ।

समितिका कार्यवाहक संयोजक डा. जगमान गुरुङले आइतबार विज्ञप्ति जारी गर्दै राप्रपाको उक्त प्रदर्शन तथा बृहत्त् आमसभामा राष्ट्रिय झण्डासहित सहभागी हुन कार्यकर्ता र समर्थकलाई नेका छन् ।

‘चैत २६ गते काठमाडौंको भृकुटीमण्डपमा सम्पन्न हुने प्रदर्शन तथा बृहत आमसभाप्रति संयुक्त जनआन्दोलन समितिको साथ समर्थन छ,’ डा. गुरुङद्वारा जारी विज्ञप्तिमा भनिएको छ ।

नवराज सुवेदी नेतृत्वको संयुक्त जनआन्दोलन समितिको आयोजनामा गत चैत १५ गते तीनकुनेमा भएको प्रदर्शनमा हिंसा भड्किँदा दुई जनाको ज्यान गएको थियो ।

जनकमान्डर बनाइरहेका दुर्गा प्रसाईं र राप्रपा वरिष्ठ उपाध्यक्ष रवीन्द्र मिश्रले भिडलाई उकासेपछि भउको हिंसात्मक प्रदर्शन नियन्त्रणमा लिन प्रहरीले चलाएको गोली २० जनालाई लागेको थियो । प्रदर्शनमा जनकमाण्डर तोकिएका दुर्गा प्रसाईं भिडलाई उत्तेजित पारेदेखि अहिलेसम्म फरार छन् ।

संयुक्त जनआन्दोलन समितिका संयोजक तत्कालीन राष्ट्रिय पञ्चायतका पूर्वअध्यक्ष नवराज सुवेदीलाई सरकारले विशेष निगरानीमा राखेर घरमै थुनेको छ । त्यसपछि उनले डा.गुरुङलाई कार्यवाहक संयोजक तोकेका थिए ।