काठमाडौं – नेपाल वायुसेवा निगमले आफ्ना विमानहरूको उडानसम्बन्धी विभिन्न सञ्चारमाध्यममा आएका समाचारप्रति ध्यानाकर्षण भएको जनाएको छ ।

निगमले बिहीबार एक विज्ञप्ती जारी गर्दै निगमको ९एन–एकेडब्ल्यू विमान भैरहवामा मर्मतसंभार पश्चात उडान सुचारु गरेको जानकारी दिएको हो ।

नेपाल वायुसेवा निगमले अन्तर्राष्ट्रिय प्रचलन अनुसार विमान निर्माता कम्पनी र नियमनकारी निकायले तोकेको मापदण्ड अनुसार मर्मतसंभार गरि पूर्णरूपले उडानयोग्य भइसकेपश्चात यात्रुको सुरक्षालाई उच्च प्राथमिकतामा राखी उडान संचालन गर्दै आइरहेको विज्ञप्तीमा उल्लेख छ ।

बुधबार निगमको ९एन–एकेडब्ल्यू विमान भैरहवाबाट दुबईको लागि प्रस्थान गर्ने क्रममा पाईलटले उडान पूर्वको नियमित चेकजाच गर्दा जहाजमा प्रविधिक समस्या देखिएको थियो । त्यसपछि यात्रुहरुको सुरक्षालाई ध्यानमा राखेर सो उडान स्थगन गरि आज निगमको आफ्नै विमान ९एन–एकेएक्स बाट भैरहवा देखि दुबईको लागि सबै यात्रु सहित प्रस्थान गरिसकेको निगमले जानकारी दिएको छ ।