काठमाडौं – जय ट्रफी एलिट कप क्रिकेटको दोस्रो दिनको सुरुवातमा बलर नै हाबी देखिएका छन्। सोमबार त्रिभुवन आर्मीका साहब आलमले ८ विकेट पूरा गरेका छन्। नेपाल पुलिसविरुद्ध आक्रामक बलिङ गरेका साहबले आइतबार पाँच विकेट लिएका थिए। सोमबार थप व्यक्तिगत तीन विकेट लिँदै आठ विकेट पूरा गरेका हुन्।

पहिलो दिनको खेल सकिँदा १०३ रन बनाएको पुलिस ३३.१ ओभरमा १२५ रन बनाएर अलआउट भएको छ। आज पुलिसविरुद्ध १५.१ ओभर बलिङ गरेका उनले ५९ रन दिएर आठ विकेट हात पारेका हुन्।

वीरगञ्जस्थित नारायणी क्रिकेट मैदानमा आइतबार सुरु भएको खेलको पहिलो दिन सकिँदा नेपाल पुलिसले २४ ओभरमा ७ विकेटको क्षतिमा १०३ रन बनाएको थियो। आजको खेल त्यहीबाट सुरु भएको हो।

पुलिसका लागि गुल्सन झाले सर्वाधिक ४७ रन बनाए। उनी अर्धशतक बनाउन तीन रनले चुके। अमित श्रेष्ठले १८, राशिद खानले १६, शङ्कर राणाले १३ र दिलिप नाथले १० रन बनाउनुबाहेक अन्य ब्याट्सम्यानले दोहोरो अंकमा रन जोड्न सकेनन्।

आर्मीका लागि सोमपाल कामी र पवन कार्कीले १/१ विकेट लिए।

पहिलो इनिङ्समा आर्मी ३४.४ ओभरमा १२१ रनमा अलआउट भएको थियो। पुलिसले दोस्रो दिनको खेलको सुरुमै चार रनको अग्रता बढाएको छ।

यसअघि आर्मीका लागि कुशल मल्लले २५, भीम सार्कीले २२, कप्तान विनोद भण्डारीले २१ रन बनाए। बसिर अहमदले १२ र साहब आलमले ११ रन बनाएका थिए।

पुलिसका लागि ललित राजवंशीले ७ विकेट लिएका छन्। उनले १४.४ ओभरमा ४७ रन खर्चेर ७ विकेट लिएका हुन। सो क्रममा उनले चार ओभर मेडन राखेका थिए।