काठमाडौं- विश्व उइग्युर कंग्रेस डब्लूयूसीले चीनले गर्दै आएको मानव अधिकार उल्लङ्घनका घटनाबारे विश्व समुदायले कुनै आवाज नउठाएकोमा चिन्ता व्यक्त गरेको छ । डब्लूयूसीले साप्ताहिक बिफ्रिङ जारी गर्दै चीनले विश्व हरित ऊर्जाको क्षेत्रमा आफूलाई अगुवाका रुपमा परिचित गराएपनि मानव अधिकार उल्लङ्घनका घटनाबारे विश्व समुदाय चुप बसेको जनाएको हो ।

हालै आयोजित कोप ३० जलवायु सम्मेलनमा पनि चीनले कुनै किसिमको प्रश्नको सामना नगरेको डब्लूयूसीले उल्लेख गरेको छ । हरित ऊर्जाको क्षेत्रमा आफ्नो प्रभावलाई सुदृढ बनाउन चीनले बधुँवा मजदुरको प्रयोग र पर्यावरण विनाशलाई जारी नै राखेको डब्लूयूसीको भनाइ छ ।

चीनले सौर्य ब्याट्रीको उत्पादन र विकासका लागि पूर्वी तुर्केस्तान भनिने सिन्जियाङ क्षेत्रमा बधुँवा मजदुरको प्रयोग गरेको र तिब्बतमा पर्यवरणीय विनाश निम्त्याएको डब्लूयूसीको आरोप छ ।

क्यानाडामा आयोजित हेलिफ्याक्स अन्तर्राष्ट्रिय सुरक्षा मञ्चमा डब्लूयूसीका कार्यकारी प्रमुख रुशान अब्बासले उइग्युर नरसंहारको मुद्दा उठाएकी थिइन् । उक्त कार्यक्रममा अमेरिका, क्यानाडा, कोलम्बियाका अधिकारकर्मीको सहभागिता रहेको थियो ।