काठमाडौं- अफगानिस्तानसँगको नाका बन्द हुँदा पाकिस्तानमा आर्थिक समस्या पैदा हुन थालेको छ । गत अक्टोबर ११ यता दुई देशबीचको सीमा नाका ठप्प छ ।

सीमा नाका बन्द हुँदा पाकिस्तानको व्यापार, उत्पादन र निर्यात क्षेत्रमा नकारात्मक असर परेको हो । उसै पनि संकटग्रस्त रहेको पाकिस्तानी अर्थतन्त्रको अवस्था अफगानिस्तानसँगको व्यापार ठप्प हुँदा अझ गम्भीर हुने चिन्ता उत्पन्न भएको छ ।

पाकिस्तानबाट प्रकाशित हुने डन अखबारका अनुसार सीमा नाका ठप्प हुँदा मूल्यवृद्धि, अभाव र उत्पादन क्षेत्रमा व्यवाधान उत्पन्न भएको छ । ढनका अनुसार अफगानिस्तानबाट आयात हुने कोइलाको आपूर्ति ठप्प हुँदा विशेषगरी पाकिस्तानको सिमेन्ट उद्योगमा नकारात्मक प्रभाव परेको छ ।

यसबाट उत्तरी पाकिस्तानमा रहेका कतिपय सिमेन्ट उद्योग ठप्प भएका छन् । कतिपय उद्योगले चाहिँ दक्षिण अफ्रिका, इण्डोनेशिया, मोजाम्बिकजस्ता मुलुकबाट आयात हुने महङ्गो कोइलाको भरमा कारखाना सञ्चालन गरिरहेका छन् ।

त्यसबाहेक अफगान बजारमा निर्भर पाकिस्तानको औषधि उद्योग पनि मारमा परेको छ । पाकिस्तानको औषधि उत्पादक संघका अध्यक्ष कैसर वहिदका अनुसार पाकिस्तानले अफगानिस्तानतर्फ हरेक वर्ष १८ करोड ७० लाख डलर बराबरको औषधि निर्यात गर्दै आएको छ । अहिले नाका बन्द हुँदा अफगानिस्तान निर्यातका लागि तयार पारिएको ठूलो परिमाणको सामान गोदाममै राखिएको छ ।