काठमाडौं– नेपाली कम्युनिष्ट पार्टीका संयोजक पुष्पकमल दाहाल प्रचण्डले आफूहरूको पार्टीलाई एक नम्बरको पार्टी बन्न अब कसैले रोक्न नसक्ने दाबी गरेका छन् । 

बुधबार काठमाडौंको भृकुटीमण्डपमा आयोजित पार्टी एकता राष्ट्रिय सम्मेलनलाई सम्बोधन गर्दै प्रचण्डले कम्युनिस्ट इतिहासमा १० घटकको एकता भएको दिन अभूतपूर्व, ऐतिहासिक र असाधारण हुने भन्दै एक नम्बरको पार्टी बन्न अब कसैले रोक्न नसक्ने दाबी गरे ।

उनले कम्युनिष्ट पार्टीको एकताले कतिपय प्रतिक्रियावादी टाउको दुखेको उल्लेख गरे । आफूलाई संयोजकको रूपमा १० घटकको ठुलो भारी, जिम्मेवारी दिएकोमा विशेष हर्ष र गर्वको महसुस भएको उनले बताए । 

प्रचण्डले  १०पार्टी मिल्दैमा पुग्यो भन्ने पक्षमा आफूहरू नरहेको उल्लेख गर्दै अन्य कम्युनिस्ट घटक या एमालेसँग समेत बृहत् एकताको निम्ति राष्ट्र बचाउन, लोकतन्त्र र गणतन्त्रको रक्षाका निम्ति हातेमालो गर्न तयार रहेको जिकिर गरे । 

उनले जेन-जी आन्दोलनले उठाएका मुद्दाले आफूहरूको कमजोरी उजागर गरेकै कारण पार्टीभित्रका कमजोरी सच्याएर नयाँ अभियानमा अघि बढ्न प्रेरित गरेको धारणा राखे ।

त्यस्तै प्रचण्डले आफूहरू पार्टी नेतृत्वमा नै बसिरहनुपर्छ भन्ने नरहेको भन्दै नयाँ विचार, विधि र प्रणालीको विकास गरेर फरक भूमिकामा जान तयार रहेको स्पष्ट पारे । 

उनले पार्टी एकतासँगै अव देशभर एकता घोषणा सभा र अभियान लिएर जाने जानकारी दिए ।