काठमाडौं– नेकपा एकीकृत समाजवादीकी नेतृ रामकुमारी झाँक्रीले सो पार्टीसँगको राजनीतिक यात्रा समाप्त भएको घोषणा गरेकी छन् । 

बुधबार काठमाडौंमा पत्रकार सम्मेलन गर्दै झाँक्रीले माओवादीसँग एकता गरेसँगै एकीकृत समाजवादी विघटन भएको उल्लेख गर्दै अब सो पार्टीसँगको राजनीतिक यात्रा समाप्त भएको घोषणा गरेकी हुन् ।

प्रारम्भका दिनहरुमा भयानकै अभियान चल्छ होला भन्ने विश्वासले नयाँ अभियानमा जोडिए पनि त्यो अभियान एक हिसाबले समाप्त भएको र आफूहरूको अध्याय टुंगिएको उनले बताइन् ।

झाँक्रीले अहिले आफूहरू पार्टीविहीन बनेको र पजको अवस्थामा रहेको जिकिर गरिन् । अहिलेको एकता प्रक्रियाले बृहत्तर वामपन्थी एकता र प्रगतिशील आन्दोलनलाई कमजोर पार्ने निश्चित रहेको उनले बताइन् । 

उनले फरक–फरक बिचार राख्ने दलहरू एकैठाँउ आउँदा दल कमजोर हुन्छ भन्ने कुरा नेकपा एकतामा नै भोगेको उल्लेख गरिन् ।

त्यस्तै एकीकृत समाजवादीका नेता किसान श्रेष्ठले आफूहरू निःसर्तरुपमा मूलघर फर्किन लागेको बताए । जीवन अर्पण गरेको पार्टी एमाले भएकाले एमालेमा प्रवेश नभई घर फर्कने अभियानमा जुटेको उनले बताए । 

उनले एमालेबाट विद्रोह गरेको कुरालाई भुलेर घरमा नै स–सम्मान फर्कने वातावरण बनाइदिन एमाले नेतृत्वलाई आग्रह समेत गरे ।