काठमाडौं- पाकिस्तान सरकारले देशमा वैधानिक रूपमा बसोबास गरिरहेका १० लाखभन्दा बढी अफगान शरणार्थीहरूलाई निष्कासन गर्ने आदेश जारी गरेको छ । यी शरणार्थीहरू प्रुफ अफ रजिस्ट्रेसन (पीओआर) कार्डमार्फत बसोबास गर्दै आएका थिए ।

पाकिस्तानबाट प्रकाशित हुने डन अखबारका अनुसार गृह मन्त्रालयले जुलाई ३१ मा विशेष आदेश जारी गर्दै पीओआर कार्डहरू अमान्य भएको घोषणा गरेको छ । यसले पाकिस्तानमा रहेका सबै अफगान शरणार्थीहरूको बसाइलाई गैरकानूनी बनाएको छ ।

यो निर्णयले दशकौंदेखि पाकिस्तानमा बसोबास गरिरहेका शरणार्थीहरूलाई गिरफ्तारी, हिरासत र निर्वासनको जोखिममा पारेको छ । सरकारले प्रहरी, जिल्ला प्रशासन र कारागार अधिकारीहरूलाई १९४६ को एउटा ऐनअन्तर्गत पीओआर कार्डधारीहरूलाई कुनै न्यायिक समीक्षाबेगर गिरफ्तार गर्न र हिरासतमा राख्न अधिकार दिएको छ ।

संयुक्त राष्ट्रसंघको शरणार्थी निकाय (यूएनएचसीआर) ले यो कदमले अन्तर्राष्ट्रिय कानुनको उल्लङ्घन गर्ने चेतावनी दिएको छ । डनका अनुसार हाल अफगान शरणार्थीहरु भय र अनिश्चिततामा छन् ।