काठमाडौं- भारतको उत्तराखण्ड राज्यस्थित उत्तरकाशीमा मंगलबार दिउँसो मुसलधारे वर्षापछि बाढी आउँदा चार जनाको ज्यान गएको छ । धराली गाउँमा एक्कासी आएको लेदोसहितको बाढीले बस्तीनै बगाएको छ ।

उत्तरकाशीका जिल्ला मजिस्ट्रेट प्रशान्त आर्याले कम्तीमा चार जनाको मृत्यु भएको पुष्टि गरेका छन् । “बाढीको ठूलो लहरले क्षेत्रलाई प्रभावित गरेको छ। हामीले जीवन र सम्पत्तिको क्षति मूल्यांकन गरिरहेका छौं,” उनले भने । धराली गाउँ गंगोत्री जाने बाटोमा प्रमुख बासस्थान हो । यस क्षेत्रमा होटल, रेस्टुरेन्ट, र होमस्टेहरू सञ्चालित छन् ।

मंगलबार दिउँसो करिब १ बजेर ४० मिने जाँदा धराली गाउँमा बाढी आएको हो । सामाजिक सञ्जालमा सार्वजनिक भएका भिडियोहरुमा बाढीले बस्ती नै बगाएको देखिन्छ ।

भारतीय सञ्चार माध्यमका अनुसार बाढीले २०÷२५ वटा होटल र होमस्टेहरू बगाएको छ । यसमा परी एक दर्जनजति मासिनहरु भग्नावशेषमा पुरिएको आशंका गरिएको छ । बाढी आएपछि नजिकैका गाउँबस्तीमा सडक र सञ्चार सञ्जाल अवरुद्ध भएको छ ।

यसले गर्दा उद्धार कार्य थप जटिल भएको जनाइएको छ । स्थानीय प्रशासनले त्यहाँका मानिसहरुलाई घरभित्रै रहन र जोखिमपूर्ण क्षेत्रहरूबाट टाढा रहन आग्रह गरेको छ ।

हाल सो क्षेत्रमा उद्धार तथा राहत कार्यका लागि भारतीय सेनाको इबेक्स ब्रिगेड, राज्य तथा केन्द्र सरकारका विपद् प्रतिकार्य बल र स्थानीय प्रहरी खटिएका छन् ।

उत्तराखण्डका मुख्यमन्त्री पुष्कर सिंह धामीले यो घटनालाई “अत्यन्त दुखद र पीडादायी” भनेका छन् । उनले वरिष्ठ अधिकारीहरूसँग निरन्तर सम्पर्कमा रहेको र स्थितिको निगरानी गरिरहेको उल्लेख गरेका छन् ।

केन्द्रीय गृहमन्त्री अमित शाहले पनि मुख्यमन्त्री धामीसँग सम्पर्क गरी स्थितिबारे जानकारी लिएका छन् । उनले केन्द्र सरकारबाट उद्धार तथा राहत कार्यमा पूर्ण सहयोगको आश्वासन दिएका छन् ।