काठमाडौं – एएफसी महिला एसियन कप छनोट अन्तर्गत समूह ‘एफ’ को अन्तिम खेलमा नेपालले शनिबार उज्बेकिस्तानसँग प्रतिस्पर्धा गर्दैछ। खेलका लागि नेपालले आफ्नो सुरुवाती ११ खेलाडीको घोषणा गरिसकेको छ।

श्रीलंकाविरुद्धको अघिल्लो खेलमा मैदान उत्रिएको टोलीमा एक मात्र परिवर्तन गरिएको छ। प्रीति राईको स्थानमा मिडफिल्डर पूजा रानालाई अवसर दिइएको छ ।

नेपालको गोलपोस्टको जिम्मेवारी अन्जना रानामगरले सम्हाल्नेछिन्। रक्षा पंक्तिमा समीक्षा घिमिरे, गीता राना र निशा थोकर रहनेछन्।

मिडफिल्डमा पूजा रानासँगै रेनुका नगरकोटे, सरस्वती हमाल, सबिता रानामगर र अनिता बस्नेत खेल्ने छन्।

आक्रमणको अग्रपंक्तिमा भने अनुभवी स्ट्राइकर साबित्रा भण्डारीलाई रश्मी घिसिङले साथ दिनेछिन्। समूह चरणको यो निर्णायक खेलमा नेपालले उत्कृष्ट प्रदर्शन गर्ने अपेक्षा गरिएको छ ।