काठमाडौं– अशोक राई नेतृत्वको जनता समाजवादी पार्टी (जसपा) का नेता अशोक यादवमाथि लागेका आपराधिक मुद्दा प्रहरीले सार्वजनिक गरेको छ ।

सर्लाहीका एसपी योगेन्द्रकुमार खड्कालाई फोनमा ‘अपशब्द’ प्रयोग गर्ने जसपाका नेता यादवमाथि चोरी, अभद्र व्यवहार, र ज्यान मार्ने उद्योग जस्ता गम्भीर आपराधिक मुद्दा दर्ता रहेको प्रहरीले सार्वजनिक गरेको छ ।

जनता समाजवादी पार्टी (जसपा) का मधेस प्रदेश नेता तथा पूर्व प्रदेशसभा सदस्य यादवका कसुरमाथि लागेका मुद्दा जिल्ला प्रहरी कार्यालय सर्लाहीले शनिबार सार्वजनिक गरेको हो । प्रहरीका अनुसार यादव पटक–पटक आपराधिक गतिविधिमा संलग्न भएको देखिएको छ ।

पछिल्लो पटक एसपी खड्कालाई फोनमा गाली गर्ने यादवलाई आपराधिक उपद्रव सम्बन्धी कसुरमा अदालतबाट पक्राउ पुर्जी जारी भएको छ। यसअघि पनि उनीमाथि विभिन्न मुद्दा लागेका थिए ।

बिहीबार राति सर्लाहीका एसपी खड्का र जसपाका प्रदेश अध्यक्ष यादवबिच फोनमा गालीगलौज भएको अडिओ सामाजिक सञ्जालमा भाइरल भइरहेको छ । यादवले एसपी खड्कालाई प्रहरीले कमिसन उठाएर खाएको आरोप लगाएका छन् ।

जसपा नेता यादवलाई नियन्त्रणमा लिन प्रहरी परिचालन गरेको सर्लाही प्रहरीले जनाएको छ। जिल्ला प्रहरी कार्यालय सर्लाहीका प्रवक्ता डीएसपी सरोज राईका अनुसार असार १३ गते पूर्वाधार कार्यालयले शान्ति सुरक्षाको प्रबन्ध गर्न निवेदन दिएको थियो । सोही निवेदन अनुसार प्रहरीले सुरक्षा दिँदा विवाद उत्पन्न भएको हो ।