काठमाडौं– नेकपा एमालेका युवा नेता महेश बस्नेत ०७१ सालमा उद्योगमन्त्री बनेका थिए । मन्त्री भएकै बेला बस्नेत पतञ्जलि योगपीठका स्वामी रामदेवलाई भेट्न भारतको हरिद्वार गएका थिए ।

मन्त्री बस्नेतले ‘निजी भ्रमण’का रुपमा हरिद्वार पुगेर बाबा रामदेवका साथै आचार्य बालकृष्णसँग भेट गरेका थिए । सो भेटमा उनले नेपालमा पतञ्जलि ग्राम स्थापना गर्न आग्रह गर्दै रामदेवलाई जग्गा उपलब्ध गराउने आश्वासन दिएका थिए ।

‘बारास्थित विशेष आर्थिक क्षेत्र सेजको नाममा करीव साढे आठ सय बिघा जग्गा छ, त्यसमध्ये ५/६ सय बिघामा पतञ्जलिका सबै उत्पादन गर्न आग्रह गरें’, तत्कालीन उद्योगमन्त्री बस्नेतले हरिद्वारबाट फर्केपछि मिडियालाई प्रतिक्रिया दिएका थिए ।

उक्त भेटका बेला पतञ्जलि योगपीठका तर्फबाट आचार्य बालकृष्णले बारा जिल्लाको सेजमा पतञ्लजिको उद्योग स्थापना गर्ने इच्छा देखाएको बस्नेतले बताएका थिए ।

भेटका क्रममा रामदेवले तत्कालीन मन्त्री बस्नेतलाई सम्मानसमेत गरेका थिए ।