वाशिङ्टन – अमेरिकी राष्ट्रपति डोनाल्ड ट्रम्पले अमेरिकी संसद्को दुवै सदनलाई संयुक्त रुपमा सम्बोधन गर्ने भएका छन्।

राष्ट्रपति निर्वाचित भएपछि ट्रम्पले अमेरिकाको दुवै सदनलाई संयुक्त रूपमा पहिलो पटक सम्बोधन गर्न लागेका हुन्। नेपाली समय अनुसार बुधबार बिहान उनले संसद्लाई सम्बोधन गर्नेछन्। जनवरी महिनामा ह्वाइट हाउस प्रवेश गरे यता ट्रम्पको यो पहिलो पटक संसद्लाई सम्बोधन हुनेछ।

राष्ट्रपति ट्रम्पको दुई तिर संसद्का सभामुख माइक जोन्सन र उपराष्ट्रपति जेडी भान्स हुने छन्। एलन मस्क दर्शकको रूपमा रहने अनुमान गरिएको छ। ट्रम्पको सो सम्बोधन चार चरणमा हुनेछ।

पहिलो चरणमा कार्यालय प्रवेशको पहिलो महिना अत्यन्त सफल भएको घोषणा हुनेछ। दोस्रो चरणमा आर्थिक विषय हुनेछ। तेस्रो चरणमा ट्रम्पले आप्रवासी डिपोर्ट र मेक्सिकोको सीमामा पर्खाल लगाउने योजनाका लागि संसद्को एकबद्धताका लागि निम्ति कुरा राख्ने छन्।

चौथो चरणमा ट्रम्पले शान्ति स्थापनाका आफ्ना योजनाका बारे बोल्ने छन्।