काठमाडौं – बक्स अफिसमा कीर्तिमानी ब्लकबस्टर साबित भएको फिल्म ‘पूर्णबहादुरको सारङ्गी’का निर्देशक सरोज पौडेलले ’कोसेढुङ्गा’ निर्देशन गर्ने भएका छन् । ‘पूर्णबहादुरको सारङ्गी’पछि उनको यो पहिलो फिल्म हो ।

निर्माण पक्षले आइतबार थिम पोस्टर सार्वजनिक गर्दै फिल्म निर्माण गर्ने र पौडेलले निर्देशन गर्ने जानकारी दिएको हो ।

थिम पोस्टरमा पृष्ठभूमी घुरमैलो पहाडी गाउँको बहिनी देख्न सकिन्छ । पोस्टरको दायाँपट्टीको भागमा रातो चोलो र पहेँलो सारी लगाएकी एक महिलालाई देख्न सकिन्छ ।

पोस्टरले ग्रामिण भेगको कथामा फिल्म बन्ने संकेत गर्छ । तर, निर्माण पक्षले कथा र कलाकारबारे खुलाएको छैन ।

निर्देशक पौडेल भन्छन्, ‘फिल्म कस्तो हुने, कथा के हो, कलाकार को-को हुने त्यो हामी केही समयपछि जानकारी गराउनेछौँ । हामी यति भन्छौँ, पूर्ण बहादुरको सारङ्गी जसरी दर्शकले मन पराउनुभयो त्यसैगरी यो फिल्मले पनि दर्शकको मन जित्ने प्रयासमा छौँ ।’

वि.सं. २०८२ सालमै फिल्म प्रदर्शनमा ल्याउने तयारीमा निर्माण पक्ष रहेको बुझिएको छ । नरदेवी फिल्मसको प्रस्तुति रहेको यस फिल्मका निर्माता प्रेविल कँडेल र हरि महत रहनेछन् ।