काठमाडौं- फिनल्याण्डले पाकिस्तानमा रहेको आफ्नो राजदूतावास बन्द गर्ने भएको छ । ‘रणनीतिक र कार्यगत’ कारणले इस्लालमावादमा रहेको राजदूतावास बन्द गर्न लागिएको फिनल्याण्डको विदेश मन्त्रालयले जनाएको छ ।

फिन्निश सरकारले पाकिस्तानसँगै अफगानिस्तान र म्यान्मारमा रहेका दूतावास पनि बन्द गर्ने जनाएको छ । पाकिस्तानबाट प्रकाशित हुने डन अखबारका अनुसार सन् २०२६ मा फिनल्याण्डले इस्लामावादस्थित आफ्नो राजदूतावास बन्द गर्नेछ ।

रणनीतिक र कार्यगत कारणसँगै ती मुलुकको बदलिँदो राजनीतिक अवस्था र फिनल्याण्डसँग आर्थिक र व्यापारिक सम्बन्ध सीमित रहेकाले पनि राजदूतावास बन्द गर्नुपरेको मन्त्रालयले उल्लेख गरेको छ ।

डनका अनुसार यसअघि सन् २०१२ मा पनि फिनल्याण्डले इस्लामावादस्थित राजदूतावास बन्द गरेको थियो । यद्यपि पछि सन् २०२२ मा पुनः उक्त दूतावास खोलिएको थियो ।

यसअघि सन् २०२३ मा स्वीडेनले पनि इस्लामावादमा रहेको राजदूतावास बन्द गरेको थियो । त्यसबेला स्वीडेनले सुरक्षाका कारण दूतावास बन्द गर्नुपरेको प्रष्ट्याएको थियो ।