काठमाडौं- नेकपा एमालेका केन्द्रीय सदस्य पासाङ शेर्पा पक्राउ परेका छन् । बहुविवाहको मुद्दामा अदालतबाट कैद सजायको फैसला सुनाइएका उनलाई प्रहरीले मंगलबार साँझ धुम्बाराहीबाट पक्राउ गरेको हो ।

जिल्ला प्रहरी परिसर काठमाडौंका एसएसपी रमेश थापाले पासाङलाई पक्राउ गरको पुष्टि गरे ।

एमालेको जन वर्गीयसंगठन जनजाति महासंघका अध्यक्ष पासाङलाई बहुविवाह मुद्दामा उच्च अदालत पाटनले गत वर्ष दोषी ठहर गरेको थियो । 

पासाङकी पत्नी करिश्मा खरेलले जिल्ला अदालत काठमाडौंमा बहुविवाहको मुद्दा दिएकी थिइन् ।

उक्त अदालतले दोषी ठहर गर्दै उनलाई एक वर्ष कैद र पाँच हजार जरिवानाको सजाय सुनाएको थियो।

त्यसविरुद्ध पासाङ उच्च अदालत गएका थिए । उच्चले पनि जिल्लाको आदेश सदर गरेको थियो । तर उनी राजनीतिक संरक्षण पाएर बाहिरै थिए ।