काठमाडौं – दर्शकबाट सकारात्मक ‘वर्ड अफ माउथ’ पाएका कारण हलहरुले फिल्म ‘परान’को शो संख्या बढाएका छन् ।पाँचौँ दिनमा प्रदर्शन यस फिल्मले सोमबार देशभर ९४ भन्दा बढी शो पाएको छ । यो प्रदर्शनको पहिलाभन्दा बढी हो ।

निर्माता रञ्जित आचार्यका अनुसार यो फिल्मले प्रदर्शनको पहिलो दिन कात्तिक १४ गते शुक्रबार ६४ वटा शो पाएको थियो । जबकि हलहरुले शनिबार र आइतबार यो फिल्मको शो संख्या घटाएका थिए । अर्थात्, ‘परान’ले पुनरागमन गरेको छ ।

सुरुवाती दिनमा फिल्मले सकारात्क ‘वर्ड अफ माउथ’ पाउँदा पनि व्यापार भने कमजोर थियो । राम्रो प्रतिक्रिया पाउँदा पनि फिल्मले कम दर्शक पाउनुको कारण झरी रहेको आँकलन गरिएको थियो ।

यो फिल्म प्रदर्शनमा आएको अघिल्लो दिन बिहीबारदेखि काठमाडौं लगायत देशका विभिन्न क्षेत्रमा झरी परेको थियो । आइतबार वर्षा हटेसँगै सोमबारबाट हलमा दर्शकको उपस्थिति पनि बढेको छ । सोहीकारण हलहरुले यसको शो बढाएका हुन् ।

यो पनि : परान’ पनि आँसुको व्यापारतिरै : पछ्याइ पछ्याइ दर्शक रोएको भिडियो खिचेर फेसबुकमा ‘बुस्ट’

सोमबारका लागि यो फिल्मको प्रि–बुकिङ पनि राम्रो देखिएको छ । मोफसलमा यसको प्रि–बुकिङ राम्रो देखिन्छ । पूर्वमा विराटनगरस्थित सिटी सिनेमाको साँझ ६ बजेको शो र इटहरीस्थित इलाइट सिनेमाको साँझ साढे ७ बजेको शोको प्रि–बुकिङ हाउसफुल छ ।

त्यस्तै, पश्चिममा नेपालगञ्जस्थित सिनेरोयलमा बिहान ११ः४५ र साँझ ६ बजेको शो हाउसफुल बुकिङ भएको छ । पहिलोभन्दा पाँचौ दिनमा शो संख्या बढ्नुलाई फिल्मको कन्टेन्टले दर्शकको मन जितेको रुपमा बुझ्न सकिन्छ ।

यस फिल्ममा वरिष्ठ कलाकार नीर शाह शीर्ष भूमिकामा छन् । नायहरु प्रवीण खतिवडा, महेश त्रिपाठी, नायिकाहरु केकी अधिकारी र अञ्जना बराइली मुख्य भूमिकामा छन् । उद्योगी तथा व्यापारी शेखर खोल्छा र रञ्जिता आचार्य यसको निर्माता हुन् ।