काठमाडौं– राष्ट्रिय सभाका उपाध्यक्ष विमला घिमिरेले नागरिकता ऐन २०६३ को संशोधन विधेयकलाई आवश्यक सुधार गरेर पारित गर्न सकिने बताएकी छन् ।  

महिला कानून र विकास मञ्चले शुक्रबार काठमाण्डौमा आयोजना गरेको नागरिकता ऐन सम्बन्धी अन्तरक्रिया कार्यक्रममा बोल्दै उपाध्यक्ष घिमिरेले संविधानले व्यवस्था गरेका प्रावधानहरूलाई ऐन मार्फत कार्यान्वयन गर्नका लागि विधेयकमा सुधार गरेर जान सकिने धारणा राखेकी हुन् ।

संविधानले समानता र न्यायको भावना बोकेकाले नागरिकता ऐन त्यसलाई व्यवहारमा उतार्ने माध्यम हुनुपर्ने उनले बताइन् । उनले नागरिकता सम्बन्धी ऐनले ब्यक्तिको  सामाजिक, आर्थिक, सांस्कृतिक र राजनीतिक सहभागिताको ढोका खोल्ने हुँदा बढी संवेदनशील हुन आग्रह पनि गरिन् । 

राष्ट्रिय सभाले एक दृढ, विवेकपूर्ण र मानवीय दृष्टिकोण अपनाउँदै यो विधेयकलाई न्यायोचित रूप दिने दिशामा काम गर्नुपर्ने उनले बताइन् ।  

कार्यक्रममा सहभागीहरूले ऐनमा रहेका केही बुँदाहरूमा संशोधन गर्नका लागि पहल गर्ने प्रतिबद्धता जनाएका थिए ।