काठमाडौं – भदौ ६ बाट प्रदर्शनमा आउन लागेको फिल्म ‘माग्ने राजा’मा पनि ‘माग्ने बूढा’कै भूमिकामा देखिएको भन्दै दर्शकले असन्तुष्टिसहितको टिप्पणी गरेपछि केदार घिमिरे बोलेका छन् ।

केदारले ‘छक्का पञ्जा’ टिमले निर्माण गरेको सबै फिल्ममा ‘माग्ने बूढा’कै भूमिका निर्वाह गरेका थिए । ठूलो पर्दामा पनि उनलाई ‘माग्ने बूढा’को भूमिकामा रुचाइएको छ ।

केदारलाई ‘माग्ने बूढा’को चरित्रमा हेर्न केही दर्शक अघाएका छन् । ती दर्शकहरुको असन्तुष्टिपूर्ण प्रतिक्रिया ‘माग्ने राजा’ टिजरमा देख्न पाइन्छ ।

यस फिल्ममा पनि केदारको ‘हल्का रमाइलो’ भन्ने चर्चित संवाद समावेश भएकामा समेत असन्तुष्ट बनेको दर्शक भेटिएका छन् ।

समग्रमा केदारले नयाँ भूमिकामा अभ्यास नगरेकामा उनीहरुको बढी असन्तुष्टि छ ।

एक सामाजिक सञ्जाल प्रयोगकर्ताले लेखेका छन्, ‘फेरि त्यही क्यारेक्टर । उस्तै टोन । त्यही पुरानो अभिनय । त्यही हल्का रमाइलो भन्ने संवाद । आजसम्म माग्ने बूढाको जति पनि फिल्म हेरियो, त्यही एउटै भूमिका बाहेक केही नयाँ देख्नै पाइएन ।’

यस्ता प्रतिक्रिया कमेन्ट बक्समा टन्नै छन् । तथापि फिल्म प्रदर्शनमा प्रतीक्षा रहने दर्शक कमेन्ट बक्समा बढी भेटिए ।

केदारले नयाँ भूमिकामा दर्शकले आफूलाई हेर्न चाहेको प्रतिक्रियालाई सकारात्मक ढंगले लिएको अभिव्यक्ति दिएका छन् ।

उनले भने, ‘टिजरमा आएको प्रतिक्रियाले हामी खुसी छौं । मलाई फरक भूमिकामा हेर्ने चाहनासाथ दर्शकले प्रतिक्रिया दिनुभएको छ । यसलाई सकारात्मकरुपमा लिएको छु ।’

यस फिल्ममा आफू ‘माग्ने राजा’कै चरित्रमा देखिनुको बाध्यताबारे पनि उनी बालेका छन् ।

भन्छन्, ‘माग्नैकै चरित्रको निरन्तरता स्वरुप यो फिल्ममा मैले भूमिका निर्वाह गरेको हुँ । त्यसैले यसमा पुरानो माग्नेको लवज र थेगो प्रयोग भएको हो ।’

‘माग्ने राजा’मा दर्शकले भिन्नमा ‘माग्ने’लाई देख्न पाउने उनको दाबी छ ।