काठमाडौं– बेरोजगार युवायुवतीलाई आकर्षक तलबको प्रलोभनमा पारी रोजगारीका लागि विभिन्न देशहरू पठाइदिने भन्दै लामो समयसम्म झुक्याएर नपठाई सम्पर्कविहीन भएको आरोपमा दुई जना पक्राउ परेका छन् । 

पक्राउ पर्नेमा महोत्तरी घर भई ललितपुर बस्ने ५५ वर्षीय वीर बहादुर घिसिङ र महोत्तरी नै घर भई कोटेश्वर बस्ने ३९ वर्षीय दिनेश खड्का रहेका छन् । 

पक्राउ परेका मध्ये घिसिङले नर्वे र डेनमार्क पठाउने भन्दै दुई जनाबाट ५ लाख १० हजार रुपैयाँ र खड्काले पोर्चुगल पठाइदिन्छु भन्दै एक जनाबाट दश लाख रुपैयाँ लिएको भन्दै पीडितले दिएको जाहेरी अनुसार काठमाडौं उपत्यका अपराध अनुसन्धान कार्यालयबाट खटेको प्रहरी टोलीले उनीहरूलाई पक्राउ गरेको हो । 

उनीहरू माथि थप अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको प्रहरीले जनाएको छ ।