काठमाडौं- प्रमुख सत्तारुढ दल नेकपा एमालेले राजनीतिक स्थिरता खलबल्याउने प्रयासहरू विस्तारै कमजोर हुँदै गएको निष्कर्ष निकालेको छ ।

आइतबार ललितपुरस्थित केन्द्रीय कार्यालय च्यासलमा बसेको सचिवालय बैठकले मुलुक मूलतः राजनीतिक स्थायित्व र नीतिगत स्थिरताको बाटोमा अघि बढेको निष्कर्ष निकालेको हो ।

एमालेले स्थिरतालाई खलबल्याउने प्रयासहरू कमजोर हुँदै गएको निष्कर्ष निकालेको उपमहासचिव प्रदीप ज्ञवालीले जानकारी दिएका छन् ।

गत फागुन २५ गतेदेखि उकालो लागेको राजावादी आन्दोलन काठमाडौंको तीनकुनेमा भएको हिंसात्मक प्रदर्शनसँग सुस्ताएको सन्दर्भमा एमालेको यस्तो निष्कर्ष आएको हो ।

ज्ञवालीले २०८४ को निर्वाचनमा पार्टीलाई बहुमतप्राप्त पहिलो शक्ति निर्माण गर्न पार्टीका सम्पूर्ण ऊर्जा र सामर्थ्यलाई एकतावद्ध गर्दै अघि बढ्ने निर्णय गरेको बताएका छन् ।

यस्तै बैठकले सरकारको नीति तथा कार्यक्रम विगतको भन्दा चुस्त, व्यवस्थित र दिशानिर्देशको हिसाबले सही रहेको निष्कर्ष निकालेको छ ।

नीति कार्यक्रम जस्तै आगामी बजेट ठोस र परिणाममुखी हुनुपर्ने सुझाव पदाधिकारी सदस्यहरूले दिएको ज्ञवालीले जानकारी दिएका छन् ।

त्यस्तै बजेटले उत्पादन र उत्पादकत्वमा फोकस गर्नुपर्ने, योजनाको प्राथमिकीकरण, कृषि क्षेत्रको आत्मनिर्भर लगायतमा ध्यान दिनुपर्ने सुझाव आएको उनले बताएका छन् ।

स्रोतको अधिकतम् ध्यानमा राखेर बजेट ल्याउन पनि सुझाव दिइएको ज्ञवालीले उल्लेख गरे । बैठकले सरकारले शिक्षक र चिकित्सकहरूसँग गरेको सहमतिको स्वागत गर्दै सरकारलाई धन्यवाद दिने निर्णय गरेको उनले बताएका छन् ।