काठमाडौं– महानायक राजेश हमाल फिल्म ‘नरसिंहाः अवतार’ बाट ९ वर्षपछि ‘कमब्याक’ को तयारीमा छन् । फिल्म प्रदर्शन मिति जेठ ९ गतेलाई तोकिएको छ ।

उनी आफ्नो फिल्म सोलो रिलिज गर्ने इच्छामा देखिन्छन् । सोही कारण ‘नरसिंहा : अवतार’ को प्रदर्शन मिति चैत २९ बाट जेठमा धकेलिएको छ ।

चैत २९ मा फिल्म ‘कर्मा’ र ‘पिताम्बर’ सँग प्रतिस्पर्धा हुने भएकाले राजेशकै इच्छामा फिल्मको प्रदर्शन मिति हेरफेर भएको बुझिएको छ ।

फिल्मको पोस्टर सार्वजनिक गरी सोमबार नयाँ प्रदर्शन मिति जेठ ९ गते तोकिएको थियो ।

तर राजेशको इच्छाअनुसार फेरि पनि यो फिल्म सोलो प्रदर्शनमा नआउने भएको छ । सौगात मल्ल स्टारर फिल्म ‘जन्ते बाख्रो’ को प्रदर्शन पनि जेठ ९ लाई नै तोकिएको छ ।

‘जन्ते बाख्रो’ निर्माण टिमले बिहीबार फिल्मको गीत ‘घामै राजा’ सार्वजनिक गर्दै प्रदर्शन मितिबारे जानकारी दिएको हो ।

यो फिल्मको प्रदर्शन मिति पहिला जेठ २३ गतेलाई तोकिएको थियो । सौगातको अर्को फिल्म ‘भाइरल गोर्खे’ जेठ २३ मा प्रदर्शनमा आउने भएकाले आफूहरुले नयाँ मिति खोज्नु परेको ‘जन्ते बाख्रो’ का निर्माता सन्तोष गौतमले बताए ।

‘नरसिंह : अवतार’ मा राजेश र नायिका नीति शाह प्रमुख भूमिकामा छन् । फिल्मका निर्देशक दिवाकर भट्टराई हुन् ।

‘जन्ते बाख्रो’ मा सौगातसहित आशिफ शाह, गरिमा शर्मा केन्द्रीय भूमिकामा रहेका छन् । फिल्मका निर्देशक सिमोस सुनुवार हुन् ।