सुनसरी– पच्चीसौँ गोधूली रनिङ कप फुटबल प्रतियोगिताको उपाधि धरान– १४ ले जितेको छ ।

बिहीबार साँझ धरान उपमहानगरपालिका- १६ स्थित रङ्गशालामा भएको फाइनल खेलमा धरान- १५ लाई १–० गोलअन्तरले पराजित गर्दै धरान- १४ ले उपाधि जितेको हो । खेलको ६१औँ मिनेटमा धरान- १४ का विवेक राईले गोल गर्दै टिमलाई अग्रता दिलाएका थिए ।

खेलको अन्तिम समयसम्म दुवै टिमले थप गोल गर्न नसकेपछि त्यही गोल नै निर्णायक बन्यो । उपाधिसँगै धरान- १४ लाई नगद  एक लाख ७५ हजार पुरस्कार र उपविजेता धरान- १५ लाई नगद  एक लाख पुरस्कार प्रदान गरिएको छ । खेलको प्लेयर अफ दी म्याच धरान- १४ का आशिष पुरी घोषित हुँदै पाँच हजार पाँचसय रुपैयाँ प्राप्त गरे ।

उत्कृष्ट गोलकिपर धरान- १५ का राजीव खड्का, उत्कृष्ट डिफेन्डर धरान- १५ का अस्तोष राई, उत्कृष्ट मिडफिल्डर धरान- १५ कै अरिक गुरुङ, उत्कृष्ट स्टाइकर धरान- १४ का निमेश तामाङ, उत्कृष्ट कोच धरान १४ का शिव राईलगायतलाई जनही पाँच हजार पाँचसय रुपैयाँ पुरस्कार प्रदान गरिएको थियो ।

यही चैत ७ गतेदेखि धरान रङ्गशालामा रात्रिकालीन भएको फुटबल प्रतियोगितामा १८ वटा वडाको सहभागिता थियो ।