ललितपुर– ललितपुरको महलाक्ष्मी नगरपालिका-५ टीकाथलीमा जमिन खनेर पानी निकाल्ने क्रममा (बोरिङ) गर्दा ग्यास निस्किएर लागेको आगो निभाइएको छ ।

टीकाथलीस्थित गोदावरी खोलानजिकै बोरिङ गरेको ठाउँमा ग्यास निस्किएर मंगलबार बिहानदेखि आगोसमेत लागेको थियो । बिहान ८: ३० बाट बलेको आगो नियन्त्रण गरिएको हो ।

पानीका लागि बोरिङ खन्ने क्रममा ग्यास निस्केर आगो लागेको ललितपुर प्रहरीले जनाएको छ । आगो निभाइए पनि यो ठाउँमा ग्यास भने अझै निस्किरहेको स्थानीयले बताएका छन् ।

करिब ९ सय फिट खनिसकेपछि ग्यास निस्किएर आगो बलेको थियो । बोरिङ खन्ने क्रममा एक्कासि आगोको मुस्लासहितको ग्यास निस्केपछि स्थानीय त्रसित भएका छन् । आगोको ज्वाला निस्किएपछि बोरिङ खन्न रोकिएको छ ।

महालक्ष्मी नगरपालिकाका केही स्थानमा यसअघि पनि इनार र बोरिङ खन्ने क्रममा ग्यास निस्किने गरेको थियो ।

हेर्नुहोस् तस्बिरहरु :