काठमाडौं – हङकङको मालवाहक पानीजहाजले ताइवानको टेलिकम तारमा क्षति पु¥याएपछि समुद्रमुनि बिछ्याइएका तारको सुरक्षाबारे चिन्ता उत्पन्न छ । गत जनवरी ३ का दिन किलुङ क्षेत्रको समुद्रमुनि बिछ्याइएको चुङ्ग्वा टेलिकमको तार चुँडिएको थियो ।

आफ्नो कम्पनीको तार चुँडिएपछि चुङ्ग्वाले तटरक्षक बललाई खबर गरेको थियो । तार चुँडिएको खबर प्राप्त भएपछि यसबारे छानबिन गर्न खटिएको तटरक्षक बलका जहाजले नजिकै हङकङको शुनछिन ३९ नामक मालवाहक पानीजहाज फेला पारेको थियो ।

जहाजको रिपोर्टअनुसार त्यसबेला तार चुँडिएको क्षेत्रमा शुनछिन ३९ ले आफ्नो एङ्कर झारेको पाइएको थियो ।

गत डिसेम्बर १ यता उत्तरी ताइवानको जलक्षेत्रमा उक्त जहाजले बारम्बार आवतजावत गर्दै आएको द सिंगापुर पोस्टले जनाएको छ । ताइवानी अधिकारीहरुले यस घटनालाई शंकास्पद ठानेका छन् ।