काठमाडौं- श्रीलंकामा आएको आँधीका कारण फसेका ५७ जनालाई भारतीय वायुसेनाले उद्धार गरेको छ । भारतीय वायुसेनाको आईएफसी १८७५ हेलिकोप्टरले ५७ जनालाई सकुशल उद्धार गरेको श्रीलंकास्थित भारतीय उच्चायुक्तको कार्यालयले जानकारी दिएको छ ।

त्यसबाहेक वायुसेनाले किगाल्ले क्षेत्रमा २.५ टन अत्यावश्यक सहायता सामग्री प्रदान पनि गरेको छ । भारतले श्रीलंकामा आएको आँधीपछि ‘अपरेशन सागरबन्धु’ नामक मानवीय सहायता अभियान सञ्चालन गरेको छ ।

सामाजिक सञ्जाल एक्समा पोस्ट गर्दै उच्चायुक्तको कार्यालयले यसबारे जानकारी दिएको हो । कार्यालयका अनुसार यसरी उद्धार गरिएकाहरुमा १० जना बालबालिका पनि रहेका छन् ।

उनीहरुलाई इरुङ्गुवाटा क्षेत्रबाट उद्धार गरी मटाले क्षेत्रमा लगिएको कार्यालयले उल्लेख गरेको छ । श्रीलंकामा आएको डिटवा नामक आँधीले व्यापक बाढीपहिरो निम्त्याएको छ । जसकारण त्यहाँको जनजीवन प्रभावित भएको छ भने जनधनको क्षति पनि पुगेको छ ।