काठमाडौँ- दक्षिण अफ्रिकी स्टार ब्याटर फाफ डु प्लेसिससँग खेल्नु सपना जस्तै भएको विराटनगर किंग्सका ब्याटर लोकेश बमले बताएका छन्।

सिद्धार्थ बैंक नेपाल प्रिमियर लिग (एनपीएल)मा बुधबार विराटनगरका ब्याटर डु प्लेसिस लुम्बिनी लायन्सविरुद्ध मैदानमा उत्रिएका थिए। पहिलो खेलमा उनको ब्याट नचले पनि विराटनगरका खेलाडी लोकेशले सँगै खेल्न पाएकोमा खुशी जनाएका हुन्।

उनले खेलपछि सञ्चारकर्मीसँग कुराकानी गर्दै डु प्लेसिससँग खेल्नुपाउनु सपना जस्तै भएको प्रतिक्रिया दिए। ‘डु प्लेसिससँग खेल्नु सबैका लागि सपना जस्तै थियो। सधैं टीभीमा देखिरहेका थियौं। सँगै खेलौला भन्ने सोचेको पनि थिएन,’ लोकेशले भने, ‘हार जित आफ्नो ठाउँमा छ। उनलाई ड्रेसिङ रुपमा देख्दा एकदमै खुशी छौं।’

बुधबारको खेलमा विराटनगर लुम्बिनीसँग पाँच विकेटले पराजित भएको छ। विराटनगरले दिएको एक सय ४५ रनको लक्ष्य लुम्बिनीले १७.४ ओभरमा पाँच विकेट गुमाएर पूरा गरेको हो।

लोकेशले अझ मार्टिन गप्टिलसँग खेल्न पाउँदा विशेष लागेको बताए। ‘मेरा लागि मार्टिन गप्टिल अझ विशेष छ। किनकि, मैले उनलाई हेरेरै क्रिकेट खेल्न सुरु गरेको हुँ। खुशी छु,’ उनले भने।

व्यक्तिगत प्रदर्शनका विषयमा सोधिएको प्रश्नमा पनि उनले कोसिस गरिरहेको बताए। अहिलेसम्म प्रदर्शन सोचेअनुसार नभए पनि बाँकी खेलमा राम्रो गर्ने कोसिस रहने उनको भनाइ थियो। उनले भने, ‘मेरो प्रदर्शनमा त खुशी छैन। पहिलो खेलबाहेक राम्रो गर्न सकेको छैन। कोसिस त गरिरहेको छु, तर फेरि गल्ती गर्न पुगिहाल्छु। अब आउने खेलमा राम्रो गर्ने कोसिस गर्छु।’

आजको खेलमा आफ्नो टोलीले केही रन कम बनाएको उनको भनाइ थियो। ‘बलिङमा पनि राम्रो भएन। सोचेजस्तो बलिङ गर्न सकेनौं,’ उनले भने।

लिग चरणको अन्तिम खेलमा सुदूरपश्चिम रोयल्सलाई पराजित गर्ने विश्वास रहेको सुनाए। ‘आज हाम्रो टप अर्डर चलेन। सुदूरपश्चिमसँगको खेलमा टप अर्डर चलिदियो भने जित्छौं। टप-२ मा पुग्छौं,’ उनले भने। विराटनगर र सुदूरपश्चिमको खेल शनिबार हुनेछ।