काठमाडौं- अख्तियार दुरुपयोग अनुसन्धान आयोगले नेपाल नागरिक उड्डयनका प्राधिकरणका महानिर्देशक प्रदीप अधिकारीसहित ७ जनाविरुद्ध भ्रष्टाचार गरेको अभियोगमा मुद्दा दायर गरेको छ ।

आयोगले क्यानका महानिर्देशक महानिर्देशक प्रदीप अधिकारी, निर्देशक मुरारी भण्डारी, उप्रवन्धक तथा इन्जिनियर समृद्धि श्रेष्ठ, प्रबन्धक नलबिक्रम थापा अभियन्त्र कन्सल्टिङ प्रालिका म्यानेजिङ डाइरेक्टर विजय थापा, प्राइभेट इन्जिनियर गुरुदत्त अधिकारी र अभियन्त्र कन्सल्टिङ प्रालि विरुद्ध बुधबार विशेष अदालतमा मुद्दा दायर गरेको हो ।

भक्तपुरको नलिञ्चोकमा हेलिपोड निर्माणको क्रममा अनियमितता गरी भ्रष्टाचार गरेको अभियोगमा सबै प्रतिवादीहरूलाई प्रतिव्यक्ति १३ करोड ५७ लाख ४६ हजार २ सय १३ रुपैयाँ ७७ पैसा बिगो कायम गरेर मुद्दा दायर भएको विशेष अदालतले जनाएको छ ।

भ्रष्टाचार निवारण ऐन, २०५९ को दफा १७ को कसुरमा सार्वजनिक सम्पत्ति हानि नोक्सानी गरेको विषयमा मुद्दा दायर भएको अदालतका प्रवक्ता कृष्णशरण लामिछानेले जनाएका छन् । उनले महानिर्देशक अधिकारीको विरुद्धमा सोही ऐनको दफा २४ अनुसार थप सजाय समेत माग भएको बताए ।

बुधबार समय अभावले थुनछेकको बहस शुक्रबार मात्रै हुने प्रवक्ता लामिछानेले बताए ।

तस्बिरहरू : नेपाल फोटो लाइब्रेरी