काठमाडौं– ‘ऊ त बच्चा हो । म उसको दिमागै निकालिदिन्छु। मसँग लड्नै नआए राम्रो !’, यो थियो भारतका फाइटर चोङ्गरेङ्ग कोरेनको घमण्ड । उनले नेपाली फाइटर रवीन्द्र ढाँटविरुद्धको फाइटअघि यसरी अपमानजनक अन्तर्वार्ता दिएका थिए । तर यो घमण्ड फाइटका क्रममा केही सेकेन्डमै माटोमा मिल्यो ।

भारतको नोएडामा आयोजित म्याट्रिक्स फाइट नाइट (एमएनएफ) को बहुप्रतिक्षित बान्टमवेट टाइटल फाइटमा रवीन्द्र ढाँटले उनै भारतीय फाइटर कोरेनलाई तेस्रो राउन्डको सुरुवातमै नकआउट गरे । रवीन्द्रको यो ऐतिहासिक जितले केवल टाइटल बेल्ट मात्रै होइन, सम्पूर्ण नेपाली खेलप्रेमीको मन जितेको छ ।

फाइटअघि भारतीय मिडियामा रविन्द्रलाई ‘बच्चा’ भन्दै उपहास गर्ने कोरेनको दम्भ फाइटको रिङमा केही सेकेन्ड पनि टिक्न सकेन । तीव्र र संयमित शैलीमा आक्रमण गर्दै रवीन्द्रले कोरेनलाई लगातार प्रहार गरे । अन्ततः ती प्रहारको श्रृंखलाले कोरेन ढले । रेफ्रीले फाइट रोक्दै रवीन्द्रलाई विजेता घोषणा गरे ।

यो जीतसँगै रविन्द्र ढाँटले आफ्नो व्यावसायिक एमएम करिअरमा नवौँ जित दर्ता गरे । अब उनी एमएफएन बान्टमवेट च्याम्पियन बनेका छन् । फाइटपछि उनले भने, ‘नेपालको झण्डा काँधमा बोकेर आएको थिएँ । आज त्यो झण्डालाई रिङमै फहराउन पाएको छु।’

रवीन्द्रको जीतलाई केवल एक खेलाडीको सफलता मात्र होइन, नेपालको साहस, आत्मबल र आत्मसम्मानको विजयका रूपमा मानिएको छ । उनको यो जितपछि प्रधानमन्त्री केपी शर्मा ओलीले पनि बधाई दिएका छन् ।