काठमाडौं – कलाकार माओत्से गुरुङको निर्देशन रहने फिल्म ‘पेन्सनपट्टा’मा नायक दयाहाङ राई फाइनल भएका छन् । उनी फिल्मको शीर्ष नायकमा फाइनल भएको निर्माण पक्षले बिहीबार सार्वजनिक गरेको हो ।

निर्देशक गुरुङका अनुसार यस फिल्मको नायिका र अन्य कलाकार चयनको काम बाँकी छ ।

‘पेन्सनपट्टा’ गुरुङको निर्देशनमा बन्न लागेको दोस्रो नेपाली कथानक फिल्म हो । यसअघि उनले फिल्म ‘दयारानी’ निर्देशन गरेका थिए ।

उक्त फिल्मको पनि नायक दयाहाङ नै हुन्। अर्थात्, गुरुङले निर्देशकका रुपमा दयाहाङसँग दोस्रो सहकार्य गर्न लागेका हुन् ।

यो फिल्मको छायाङ्कन कात्तिक तेस्रो साताबाट सुरु गर्ने योजनामा गुरुङ रहेका छन् ।

‘पेन्सनपट्टा’ शीर्षकले भूतपूर्व लाहुरेको कथा जनाउने भए पनि फिल्म उक्त विषयसँग सम्बन्धित नरहेको उनले बताए । कथाबारे उनले खुलाए, ‘यो एउटा व्यक्तिमा लोभ कसरी हराउँछ भन्ने कथामा बन्न लागेको फिल्म हो ।’

यस फिल्ममा गुरुङ निर्माता र कलाकारको भूमिकामा पनि रहने बताइएको छ ।