काठमाडौं– फिलिपिन्सले भारतमा निर्मित ब्रम्होस क्षेप्यास्त्र सञ्चालन गर्ने तयारी अन्तिम चरणमा पुर्‍याएको छ । फिलिपिन्सको मरिन कोरले ब्रम्होस सुपरसोनिक क्रुज क्षेप्यास्त्र प्रणाली सञ्चालनको तयारी अन्तिम चरणमा पुर्‍याएको हो ।

फिलिपिन्सले हरेक ‘ट्रान्सपोर्टर एरेक्टर लन्चर (टीईएल)’ मा दुई क्षेप्यास्त्र राख्ने निर्णय गरेको छ । भारतले भने यस्ता टीईएलमा तीन वटा क्षेप्यास्त्र राख्दै आएको छ ।

विशिष्ट भौगोलिक बनावट र पूर्वाधारका चुनौतीलाई मध्यनजर गर्दै फिलिपिन्सले यस्तो रणनीतिक निर्णय गरेको इण्डियन डिफेन्स रिसर्च विङले उल्लेख गरेको छ । भारत र रुसले संयुक्त सहकार्यमा निर्माण गरेको ब्रम्होस क्षेप्यास्त्रको गति मक ३ सम्म रहेको जनाइएको छ ।

एउटा ब्रम्होस क्षेप्यास्त्रको औसत तौल तीन टन छ । यस क्षेप्यास्त्रको मारक दूरी तीन सय किलोमिटरसम्म रहेको जनाइएको छ ।