काठमाडौं – उपप्रधानमन्त्री एवम् शहरी विकास मन्त्री प्रकाशमान सिंहले धार्मिक स्वतन्त्रताका लागि पनि लोकतान्त्रिक शासन व्यवस्था अपरिहार्य रहेको बताएका छन् ।

शनिबार काठमाडौं घट्टेकुलोमा महाप्रज्ञा आश्रम (विहार) को समुद्घाटन कार्यक्रममा बोल्दै उनले जनता सार्वभौमसत्ता सम्पन्न भएपछि आफूलाई मन परेको धर्म मान्ने स्वतन्त्रता सुरक्षित भएको बताए । सिंहले घट्टेकुलोमा नवनिर्मित विहारको समुद्घाटन गरे ।

काठमाडौं घट्टेकुलोमा २०३० सालमा बनेको बिहार बाग्मती प्रदेश सरकारको सहयोगका पुननिर्माण भएको हो । नेपालका प्रथम थेरवाद भिक्षु महाप्रज्ञाले ०३० सालमा घट्टेकुलोमा सो विहार स्थापना गरेका थिए ।

महाप्रज्ञा बुद्ध धर्म प्रचार गरेबापत दुई पटक देश निकाला भएको सन्दर्भ चर्चा गर्दै उपप्रधानमन्त्री सिंहले अहिले त्यस्तो अवस्था नरहेको र सबैले आफ्नो इच्छाअनुसार धर्म मान्ने स्वतन्त्र रहेको बताए ।

देश निकाला हुँदा पनि आफ्नो आस्थामा अडिग रहेकाले महाप्रज्ञाको जीवनबाट कठिन अवस्थामा पनि आफ्नो निष्ठा र आस्थाबाट विचलित हुनुहुन्न भन्ने शिक्षा लिन सकिने सिंहको भनाइ छ ।

उपप्रधानमन्त्री सिंहले अहिले समाजमा नकारात्मकता बढिरहेको भन्दै सत्य तथ्य छुट्याउन सक्ने क्षमता भगवानले मानिसलाई जन्मजात दिएको भन्दै विवेकको प्रयोग गरेर सहि गलत छुट्याउन आग्रह गरे ।