काठमाडौं– काठमाडौं महानगरपालिकाका प्रमुख प्रशासकीय अधिकृत सरोज गुरागाईं करिब ४ महिनापछि कार्यकक्षमा छिरेका छन् ।

मेयर बालेन्द्र साहको सचिवालयले लगाएको ताला कर्मचारीहरूले फुटाइदिएपछि उनी कार्यकक्षमा छिरेका हुन् ।

नगर प्रहरी प्रमुख राजुनाथ पाण्डेले मेयर बालेन्द्र साहको आदेश नआएसम्म ताला नखोल्ने अडान लिँदै कार्यालयबाट बाहिरिएका थिए । त्यसपछि कर्मचारीहरूले ताला फुटाएर प्रमुख प्रशासकीय अधिकृत गुरागाईंलाई कार्यकक्षमा छिराएका हुन् ।

करिब चार महिनापछि कार्यकक्षमा बसेका उनी केहीबेर बसेर बाहिरिएका छन् । उनलाई जनप्रतिनिधि र कर्मचारीले कार्यालयमा छिराएका थिए ।

काठमाडौं टावरको भवन अनधिकृत रुपमा निर्माण अघि बढाउन अनुमति दिएको आरोप मेयर बालेन्द्र साहले गुरागाईंलाई लगाएका थिए ।

त्यसपछि गुरागाईंको कार्यकक्षमा ताला लगाइएको थियो । गाडीमा समेत बालेन्द्रले ह्वील लक गरिदिएका थिए ।