काठमाडौं- पूर्वराष्ट्रपति विद्यादेवी भण्डारीले प्रधानमन्त्री केपी शर्मा ओली नेता मात्रै नभएर राजनेता भएको बताएकी छन् ।

‘केपी शर्मा ओली: सपना, संघर्ष र सङ्कल्प’पुस्तक लोकार्पण कार्यक्रमलाई सोमबार सम्बोधन गर्दै भण्डारीले ओलीलाई स्वप्नद्रष्टा नेता भनेकी हुन् ।

आफू राष्ट्रपति भएको बेला ओली प्रधानमन्त्री हुँदा निक्कै समन्वयात्मक भूमिका खेलेको भण्डारीले स्मरण गरिन् । 

ओलीमा देश र समाजको विकासप्रतिको तीव्र हुटहुटी भएको भण्डारीले बताइन्।

‘म राष्ट्रपति हुँदा उहाँ प्रधानमन्त्री बन्नुभएको थियो । त्यसबेला उहाँले मुलुकको कार्यकारी प्रमुखको भूमिका निर्वाह गर्नुभएको समन्वयात्मक भूमिका, राजनीतिक स्थिरताको लगि खेल्नुभएको भूमिका, महाभूकम्पले भत्कारएका संरचना बनाउन देखाउनुभएको सक्रियता र सफलता, कोरोना महामारी नियन्त्रण तथा प्रभावितको उपचारमा प्रभाकारिता तथा आर्थिक समृद्धि हाँसिल गर्न उहाँमा रहेको हुटहुटी मैले नजिकबाट अवलोकन गरेको छु’, भण्डारीले भनिन् ।

भण्डारीले ओली आर्थिक, सामाजिक अभियानको कुशल अभियन्ता भएको बताइन् । ओलीमा तुलनीय सक्रियता, अदम्य इच्छाशक्ति र सृजनशील क्षमताका भएको भण्डारीको टिप्पणी छ । 

ओली एक कुशल योजनाकार, संगठक र रणनीतिकार भएको उनको भनाइ छ ।

उनले सम्बोधनका क्रममा एमालेलाई कुनै राजनीति घटना परिघटनाले विचलित गर्न नसक्ने बताइन् । ‘एमालेसँग अनुभवी, दृढ संकल्पित नेतृत्व तह छ । देशलाई यहाँसम्म ल्याउन एमालेको महत्त्वपूर्ण योगदान छ’, उनले भनिन्, ‘ओलीले एमालेको लोकतान्त्रिककरण गराउन ठूलो भूमिका खेल्नु भएको छ । कम्युनिस्ट आन्दोलनको टुट र फुटलाई एक बनाउन भूमिका उहाँको छ । भविष्यमा पनि यस किसिमको रचनात्मक पहलकदमी चालेर सफलताको सिंढी चढ्न योगदान पुग्नेछ ।’