काठमाडौं – नौसैनिक क्षमता वृद्धि गर्न इण्डोनेशियाले आफ्नै पहलमा लडाकु विमानवाहक युद्धपोत निर्माण गर्ने तयारी गरिरहेको छ । यसका लागि इण्डोनेशियाले भारतको सहयोग लिने इच्छा देखाएको छ ।

इण्डियन डिफेन्स रिसर्च विङका अनुसार इण्डोनेशिया र भारतबीच लडाकु विमानवाहक युद्धपोत निर्माणका लागि कुन क्षेत्रमा सहकार्य हुने भन्ने अझै स्पष्ट भइसकेको छैन । 

भारतले निर्माण गरेको पछिल्लो लडाकु विमानवाहक युद्धपोत आईएनएस विक्रान्तमा ७६ प्रतिशत स्वदेशी पार्टपुर्जा प्रयोग गरिएको छ ।

यद्यपि भारतले युद्धपोतको डिजाइन, इन्जिनियरिङ, बजेटमा मितव्ययिता, क्षमता विस्तारजस्ता क्षेत्रमा इण्डोनेशियालाई सहयोग गर्नसक्ने अपेक्षा गरिएको छ ।

 पछिल्ला केही वर्षयता इण्डोनेशिया र भारतबीचको सम्बन्ध थप मजबुत हुँदै आएको अवस्थामा दुई मुलुकबीचको अपेक्षित नौसैनिक सहकार्यलाई निकै महत्वका साथ हेरिएको छ ।