काठमाडौँ– धार्मिक अल्पसङ्ख्यकमाथि आक्रमणका घटना बढिरहेको भन्दै पाकिस्तानको मानव अधिकार आयोगले चिन्ता व्यक्त गरेको छ । सन् २०२३–२४ मा भएका मानव अधिकार उल्लङ्घनसम्बन्धी प्रतिवेदन जारी गर्दै आयोगले यस्तो चिन्ता व्यक्त गरेको हो ।

उक्त प्रतिवेदनमा अहमदिया समुदायको समाधिस्थलमाथि आक्रमणका घटना बढेको, धार्मिक अल्पसङ्ख्यकको घर र प्रार्थानास्थलमाथि तोडफोड गरिएको, उनीहरुलाई बिना कारण नियन्त्रणमा लिने र जबरजस्ती धर्मान्तरण गर्ने घटना बढ्दै गएको उल्लेख गरिएको छ । उक्त प्रतिवेदनमा समीक्षा अवधिमा ७ सय ५० भन्दा धेरै जनालाई ईश निन्दाको आरोपमा पक्राउ गरिएको समेत जनाइएको छ ।

त्यसैगरी, धार्मिक आस्थाकै कारण ४ जनाको हत्या भएको पनि प्रतिवेदनमा जनाइएको छ । त्यसैगरी, आयोगले अरु धर्मका व्यक्तिलाई लक्षित गरी दुष्प्रचार फैलाउनका लागि सामाजिक सञ्जालको प्रयोग बढिरहेको समेत औँल्याएको छ । 

कतिपय अवस्थामा धार्मिक आस्थाकै कारण आक्रमणको सिकार भएकाहरूले विभिन्न प्रशासनिक झन्झटको सामना गर्नुपरेको प्रतिवेदनमा जनाइएको छ ।