काठमाडौं – डेब्यू निर्देशनमै हिट फिल्म ‘घर ज्वाइँ’ दिएका निर्देशक अनिल बूढा मगरले ‘मितज्यू’ निर्देशन गर्ने भएका छन् । सरस्वति पूजाको अवसर पारेर सोमबार यस फिल्म निर्माणको घोषणा भएको हो ।

निर्माण पक्षले सोमबार पेन्टिङ थिम पोस्टर सार्वजनिक गरेर फिल्म निर्माणबारे जानकारी दिएको हो । सार्वजनिक पोस्टरमा दुई युवा भ्यानको अगाडि पञ्जा जुधाइरहेको अवस्थामा देख्न सकिन्छ । भ्यानमा खसी र खसीको टाउकामा कुखुरालाई राखिएको छ ।

यस फिल्मको निर्माता जनक घर्ती मगरले हुन् । अनिल र जनकको यो दोस्रो सहकार्य हुनेछ । जनक ‘घर ज्वाइँ’को समेत निर्माता हुन् ।

‘मितज्यू’मा कलाकार चयनको काम बाँकी रहेको निर्माण पक्षले बताएको छ । यो वर्ष छायाङ्कन सुरु नहुने बुझिएको छ । यद्यपि फिल्मको प्रदर्शन मिति भने वि.सं २०८२ सालको चैत २७ गतेलाई तोकिएको छ ।

यस फिल्मको कथा महेश राईले लेखेका हुन् । जिएम मुभिज र एबीएम सिने प्रोडक्सन ब्यानरको सहकार्यमा यस फिल्म बन्ने बताइएको छ ।

अनिलको डेब्यू फिल्म ‘घर ज्वाइँ’ले ५१ दिन मनाएको थियो । गत असार २८ बाट प्रदर्शनमा त्यस फिल्मको केन्द्रीय कलाकार नायक दयाहाङ राई र नायिका मिरुना मगर हुन् ।