काठमाडौं- युक्रेनमा जारी रुसको युद्धमा सहयोग पुर्‍याएको भन्दै युरोपेली युनियन ईयूले मुख्यभूमि चीनका दुई तेल प्रशोधनकर्ता र हङकङको एउटा तेल व्यापारी संस्थामाथि प्रतिबन्ध लगाएको छ । रुसको युद्ध अर्थतन्त्रलाई निरुत्साहित गर्ने पछिल्लो कदमस्वरुप ईयूले यस्तो घोषणा गरेको हो ।

ती संस्थामाथि प्रतिबन्ध लगाउन ईयूका सबै २७ मुलुक सहमत भएको साउथ चाइना मर्निङ पोस्टले जनाएको छ । पछिल्लो कदमसँगै हालसम्म ईयूले चीन वा हङकङका १५ वटा संस्थामाथि प्रतिबन्ध लगाइसकेको छ ।

ईयूको यस कदमको चीनले भने चर्को आलोचना गरेको छ । चिनियाँ विदेश मन्त्रालयले वक्तव्य जारी गर्दै हालसम्म चीनले युद्धरत कुनै पनि पक्षलाई घातक हतियार उपलब्ध नगराएको स्पष्ट पारेको छ । दोहोरो प्रयोग हुने वस्तुको निर्यात नियन्त्रणमा चीन प्रतिबद्ध रहेको पनि मन्त्रालयले जनाएको छ ।

अमेरिका र युरोपसहित विश्वका अधिकांश मुलुकहरुले रुससँगको व्यापारलाई निरन्तरता दिइरहेको पनि चिनियाँ विदेश मन्त्रालयले जनाएको छ ।