काठमाडौं- पाकिस्तानका पूर्वराष्ट्रपति परभेज मूशर्रफलाई ‘खरिद गर्न’ अमेरिकाले दशौँ लाख डलर खर्च गरेको सीआईएका एक जना पूर्वअधिकारीले खुलासा गरेका छन् । सीआईएका पूर्वअधिकारी जोन किरिआकोउले मूशर्रफलाई खरिद गर्न अमेरिकाले दशौँ लाख डलर खर्च गरेको खुलासा गरेका हुन् ।

भारतीय समाचार संस्था एएनआईसँगको कुराकानीका क्रममा उनले त्यसबेला पाकिस्तान गम्भीर भ्रष्टाचारमा डुबेको पनि आरोप लगाए । उनले पाकिस्तानका आम जनताले भोकमरीको सामना गरिरहेका बेला पूर्वप्रधानमन्त्री बेनजीर भुट्टोले भने खाडी मुलुकमा विलासी जीवन बिताइरहेको पनि आरोप लगाएका छन् ।

सीआईएमा १५ वर्ष काम गरेका किरिआकोउले पाकिस्तान सरकारसँग आफूहरुको सम्बन्ध अत्यन्त राम्रो रहेको पनि दाबी गरे । त्यसबेला मूशर्रफ सरकारमा रहेको भन्दै अमेरिका तानाशाहसँग काम गर्न सदैव तत्पर रहेको पनि उल्लेख गरेका छन् ।

पछि अमेरिकाले चाहेजस्तो काम गर्न मूशर्रफले खुला छाडेको पनि उनले दाबी गरेका छन् ।